呢幾日樓上個女人又發作，仲好似越來越嚴重。除左"澎"門，仲一邊上落一邊"唸咒"，有時仲講埋粗口，真係好得人驚.....尋晚十一點幾又係咁，攪到瞓著都俾佢嘈醒。

今朝本來可以唔出去買餸，不過因為要買野煲粥仔，所以就同左妹妹出去百佳，今日轉用雞柳煲粥仔，下晝果餐阿妹成碗食晒。不過佢次次食到一半，開始飽飽地，就會玩腳仔，有時又會玩口水，攪到週圍都係粥仔。食完晏，同阿妹沖完涼，再同阿哥做埋功課，我地就搭兩點八班車出元朗，再轉西鐡去屯門行街街，順便等爸爸放工。約左阿咪o係屯門西鐡站等，不過因為阿咪唔舒服，所以我地唔係行左好耐，主要係買左妹妹用o既野，包括洗衣液、combi step3果隻kitty杯同乳墊，因為有折，所以都幾抵呀~6點就返到元朗，爸爸又去買單車，今次買架二手，不過都要四百蚊，之後我地o係自家人食飯，食食下阿妹就開始扭計，之後食奶瞓左，返到屋企先醒，然後食粥仔。可能因為之前食左奶，所以食左一半就唔食，之後又到十點幾先瞓。

妹妹唔知係咪飲得唔夠水，去便便開始唔係咁暢通，今朝好辛苦痾左一粒比較硬o既，之後就痾左兩條。到差唔多6點，就痾左一細bat杰o既，返到屋企又有少少杰o既，再過多陣先再痾左d比較稀o既，真係換片都換左幾次，真係要令佢飲多d水先得。

今日涼左好多，朝早得21度左右，同阿仔著左冬季校服返學。下晝煲粥俾阿妹食，落左瘦肉去煲，本來食之前想再加西蘭花，點知阿囡開始扭眼瞓，就即刻俾佢食左先，佢都好鍾意食，不過食到一半都係要瞓覺，瞓醒先食埋淨返果D。因為幫阿仔同中中訂果兩對鞋今朝到左，霖霖今日又放假，所以佢下晝入左o黎。今日又俾左半塊米餅妹妹食，佢今次食得叻左好多，點知食食下跌左落地，之後佢係咁望住我執返起果塊餅，仲要伸手去攞，所以最後又俾過半塊佢，佢仲食晒添~我6點約左人o係西鐡站交收張搖椅，霖霖就等埋我幫我手推張搖椅過去，本來賣$300，果個人問我可唔可以平D，我居然話$250，講完我都好後悔，點解會平咁多俾佢，不過算啦，話晒都買左幾年，雖然仲好新淨，不過阿哥同阿妹都坐過，阿妹依家唔o岩坐，又費事阻地方，都係快D賣左佢算。之後我同阿仔去惠康買少少野，先返屋企煮飯，返到去都7點，煮完飯就餵阿妹食粥仔，今次加埋西蘭花，佢好鍾意食，整左一碗，最後食剩幾啖。等阿哥食完飯，仲要同佢做埋功課先沖完，沖完涼都已經9點，好彩阿妹6點時瞓左半個鐘有多，所以今晚冇咁早瞓，最後差唔多十點先瞓。夜晚大風左好多，米米都靜靜雞走入o黎瞓，不過因為佢未沖涼，所以入左o黎一陣都要佢返出去，等我得閒去買返張床仔同幾件衫仔俾佢先。